ඇමෙරිකාවේ නිව්යෝක් නගරසභා මැතිවරණය ජයග්‍රහණය කිරීමට ඩිමොක්‍රටික් පක්ෂ අපේක්ෂක සොහ්රාන් මම්දානී සමත් විය. ඒ අනුව, නිව්යෝක් නගරාධිපති ධුරයට පත්වන පළමු මුස්ලිම් නගරාධිපතිවරයා වන්නේ මම්දානීය.
ඇමෙරිකා ජනාධිපති ඩොනල්ඩ් ට්‍රම්ප්ගේ රිපබ්ලිකන් පක්ෂය නියෝජනය කරමින් මැතිවරණයට ඉදිරිපත් වූයේ ඇන්ඩෲ කියෝමෝස් ය.
කියෝමෝස් මෙම මැතිවරණය ජයග්‍රහණය කළ යුතුම යැයි ට්‍රම්ප් අවස්ථා ගණනාවකදී පවසා තිබුණි. මුස්ලිම් නගරාධිපතිවරයකු පත් වීම සම්බන්ධයෙන් ට්‍රම්ප් ප්‍රසිද්ධියේ කනස්සල්ල පළ කර ඇති බව ද පැවැසෙයි. සොහ්රාන් මම්දානී ලැබූ මෙම ජයග්‍රහණය ප්‍රතිවාදී ඩිමොක්‍රටික් පක්ෂයට විශාල වාසියක් වනු ඇතැයි ද පැවැසෙයි.
34 හැවිරිදි මම්දානී, ලබන ජනවාරි පළමු වැනිදා නගරාධිපති ලෙස දිවුරුම් දීමට නියමිතය. මම්දානී උපත ලබා ඇත්තේ අප්‍රිකා රාජ්‍යයක් වන උගන්ඩාවේ කම්පාලා නුවරදීය. ඔහු ඇමෙරිකාවට සංක්‍රමණය වී ඇත්තේ අවුරුදු 7 දීය.
මම්දානී ඇමෙරිකාවේ මේන් ප්‍රාන්තයේ බෝඩොයින් විද්‍යාලයෙන් අප්‍රිකානු අධ්‍යයන පිළිබඳ ශාස්ත්‍රවේදී උපාධියක් ලබාගෙන ඇත. දේශපාලනයට පිවිසීමට පෙර, ඔහු නිවාස උපදේශකයකු ලෙස සේවය කළ අතර, අඩු ආදායම්ලාභී පවුල්වලට ඉවත් කිරීම් වැළැක්වීමට සහාය දක්වා තිබේ. මම්දානී, මෙම වසර මුලදී විවාහ විය. ඒ, නිව්යෝක් බෘක්ලින්හි පදිංචි 27 හැවිරිදි සිරියානු ජාතික කලා ශිල්පිනියක වන රාමා දුවාජි සමඟය.
