ඇමරිකාවේ නිව්යෝර්ක් නගරයේ මීළඟ නගරාධිපතිවරයා ලෙස ප්‍රජාතන්ත්‍රවාදී සමාජවාදියෙකු තේරී පත්වීමත් සමඟ අන්තර්ජාලය තුළ ප්‍රගතිශීලී ජනතාව අතර නව උද්යෝගයක් ඇති වී තිබේ. සෝරාන් මම්දානිගේ මෙම ඓතිහාසික ජයග්‍රහණයත් සමඟ ඔහු නිව්යෝර්ක් නගරයේ පළමු මුස්ලිම් නගරාධිපතිවරයා මෙන්ම දකුණු ආසියානු සම්භවයක් ඇති පළමු වැන්නා සහ අප්‍රිකාවේ උපන් පළමු වැන්නා ලෙස ඉතිහාසයට එක්වනු ඇත. එසේම ඔහු සියවසකට වැඩි කාලයක් තුළ එම ධූරයට පත් වූ ලාබාලතම පුද්ගලයා ද වේ.
සිය ජයග්‍රාහී දේශනයේදී මම්දානි කම්කරු අයිතීන්, සංක්‍රමණික අයිතීන් සහ LGBTQ ප්‍රජාව ඇතුළු සියලුම අවදානමට ලක්විය හැකි නිව්යෝර්ක් වැසියන්ගේ අයිතීන් වෙනුවෙන් පෙනී සිටින බව නැවතත් තහවුරු කළේය. ඔහුගේ දේශපාලන වේදිකාව මූලික වශයෙන් අවධානය යොමු කළේ වැඩකරන පන්තියේ ජනතාව මුහුණ දෙන ආර්ථික අභියෝග සහ සමාජ සාධාරණත්වය පිළිබඳ ප්‍රශ්න කෙරෙහි ය. නොමිලේ බස් සේවාව, නොමිලේ ළමා සුරැකුම් මධ්‍යස්ථාන සහ කුලී පාලනයක් සහිත නිවාස සඳහා කුලී අත්හිටුවීම වැනි යෝජනා ඔහුගේ න්‍යාය පත්‍රයට ඇතුළත් විය.
NBC මැතිවරණ ප්‍රතිඵලවලට අනුව, වයස අවුරුදු 18 සිට 29 දක්වා ඡන්දදායකයින්ගෙන් 78%ක් සහ අවුරුදු 30 සිට 44 දක්වා ඡන්දදායකයින්ගෙන් 66%ක විශාල බහුතරයක් දිනා ගැනීමට මම්දානි සමත් විය. ඔහුට LGBTQ+ ප්‍රජාවගේ ඡන්දවලින් 82%ක් ලැබුණු අතර, ඔහුගේ ප්‍රතිවාදියා වූ කියුමෝට ලැබුණේ 15%ක් පමණි. මීට අමතරව, නිව්යෝර්ක් නගරයේ මුළු ජනගහනයෙන් 9%ක් පමණ වන මුස්ලිම් ප්‍රජාවගෙන් අතිමහත් සහයෝගයක් ඔහුට හිමි වූ අතර, මුස්ලිම් ඡන්දදායකයින් 10 දෙනෙකුගෙන් 9 දෙනෙකුගේම සහය ඔහුට ලැබී තිබේ.
ඇමරිකාවේ වැඩිම මුස්ලිම් ජනගහණය වසන්නේ නිව්යොර්ක් නුවරය.
මෙම ජයග්‍රහණයත් සමඟ වසර ගණනාවකට පසු පළමු වතාවට ප්‍රගතිශීලී අන්තර්ජාල පරිශීලකයින් අතර නව බලාපොරොත්තු දළුලා ඇති ආකාරය දැකගත හැකිය.මේ අතර අවේගශීලී මුස්ලිම් ප්‍රජාව තමන් නිව්යොර්ක් නුවර ඇල්ලූ බව පවසා ඇත. බොහෝ දෙනෙකු පවසන්නේ තමන් විශ්වාස කළ, තමන් වෙනුවෙන් පෙනී සිටි අයෙකු ජයග්‍රහණය කිරීම තුළින් දීර්ඝ කාලයකට පසු සැබෑ දේශපාලන වෙනසක් අත්විඳින බවත්, වසර ගණනාවකට පසු ප්‍රථම වතාවට බලාපොරොත්තු දල්වාගෙන සිටින බවත්ය. අමෙරිකානු දේශපාලනය සහ ඩිමොක්‍රටික් පක්ෂය පිළිබඳ කලකිරීමෙන් සිටි වාමාංශික මතධාරීන්ට මෙම ජයග්‍රහණය විශාල අස්වැසිල්ලක් වී තිබේ.
2024 ජනාධිපතිවරණයේදී කමලා හැරිස් ඩොනල්ඩ් ට්‍රම්ප් හමුවේ පරාජය වීමෙන් පසු බොහෝ දෙනා එම පරාජයට හේතුව ලෙස ප්‍රගතිශීලී "woke" දේශපාලන මතවාදයන් හුවා දැක්වූහ. එහෙත් ප්‍රජාතන්ත්‍රවාදී සමාජවාදියෙකු, මුස්ලිම් ජාතිකයෙකු සහ දකුණු ආසියානු සම්භවයක් ඇත්තෙකු නිව්යෝර්ක් නගරාධිපති ලෙස තේරී පත්වීම එම මතවාදයන්ට එල්ල කළ ප්‍රබල අභියෝගයක් ලෙස සැලකේ. මම්දානි බෘක්ලින්හිදී සිය ආධාරකරුවන් අමතමින් පැවසුවේ බලාපොරොත්තුව තවමත් ජීවමාන බවයි.
